🔴 बारामती हादरली! ब्लॅकमेलच्या विळख्यात 23 वर्षीय तरुणाची आत्महत्या; खडकवासल्यातील तिघांवर गुन्हा…!

🔥MK NEWS36 

🔴 ब्लॅकमेल व मानसिक छळातून तरुणाची आत्महत्या; खडकवासला येथील तिघांविरुद्ध गुन्हा, आरोपी तरुणीचे वडील API..!
बारामती, दि. 16 (प्रतिनिधी) – बारामती तालुक्यातील मौजे रुई बयाजीनगर येथे 23 वर्षीय तरुणाने मानसिक छळाला कंटाळून आत्महत्या केल्याची धक्कादायक घटना उघडकीस आली आहे. या प्रकरणी बारामती ग्रामीण पोलीस ठाणे येथे खडकवासला (पुणे) येथील तिघांविरुद्ध भारतीय न्याय संहिता, 2023 अंतर्गत गंभीर गुन्हा दाखल करण्यात आला आहे. आरोपींपैकी एक तरुणीचे वडील हे पुणे शहरात सहायक पोलीस निरीक्षक (API) म्हणून कार्यरत असल्याने प्रकरणाला विशेष महत्त्व प्राप्त झाले आहे.

मयत विक्रम उर्फ बबलु नवनाथ कोळपे (वय 23, रा. बयाजीनगर, रुई, ता. बारामती, जि. पुणे) याने 15 फेब्रुवारी 2026 रोजी सायंकाळी 7 ते 7.45 वाजण्याच्या सुमारास राहत्या घरातील किचनमध्ये लोखंडी हुकाला साडीच्या सहाय्याने गळफास घेतल्याचे पोलिसांनी सांगितले. कुटुंबीयांनी त्यास तत्काळ रुई ग्रामीण रुग्णालयात दाखल केले; मात्र वैद्यकीय अधिकाऱ्यांनी तपासणीनंतर मृत घोषित केले.
घटनास्थळी सापडलेल्या सुसाईड नोटमध्ये विक्रमने एका तरुणीकडून गेल्या पाच वर्षांपासून मानसिक छळ, धमक्या व ब्लॅकमेलिंग होत असल्याचा उल्लेख केला आहे. संबंधित तरुणीने लग्नाचे आश्वासन देत भावनिक व आर्थिक शोषण केल्याचा तसेच वैयक्तिक फोटो व चॅटच्या आधारे धमकावल्याचा आरोप नोटमध्ये नमूद आहे.
मयताच्या नातेवाईकांच्या फिर्यादीनुसार, संबंधित तरुणी, तिची बहीण आणि वडील यांनी विक्रमला पुण्यात बोलावून त्याच्या मोबाईलमधील फोटो व चॅट्स जबरदस्तीने डिलीट करण्यास भाग पाडले तसेच गंभीर परिणामांची धमकी दिली. आरोपी तरुणीचे वडील हे API पदावर कार्यरत असून, त्यांनीही दूरध्वनीवरून दमदाटी केल्याचा आरोप करण्यात आला आहे.
या प्रकरणी सृष्टी विकास मते, श्रृती विकास मते व विकास मते (सर्व रा. खडकवासला, पुणे) यांच्याविरुद्ध भा.न्या.सं. 2023 अंतर्गत कलम 108, 351(2), 351(3), 352 व 3(5) अन्वये गुन्हा दाखल करण्यात आला आहे. आरोपींपैकी एक पोलीस अधिकारी असल्याने अटकेबाबत कोणती कायदेशीर प्रक्रिया अवलंबली जाणार, तसेच वरिष्ठ स्तरावरून काय भूमिका घेतली जाणार, याकडे नागरिकांचे लक्ष लागले आहे.
दरम्यान, वरिष्ठ पोलीस अधिकाऱ्यांच्या मार्गदर्शनाखाली तपास सुरू असून सुसाईड नोट, मोबाईल डेटा, कॉल रेकॉर्ड्स व सीसीटीव्ही फुटेजच्या आधारे पुढील कारवाई केली जाणार असल्याची माहिती पोलिसांनी दिली आहे.