‘अपक्ष’ फक्त निवडणुकीपुरतेच? बारामतीत राजकीय ढोंग उघडकीस..!

🔥MK NEWS36 

अपक्षतेचा मुखवटा फाटला! बारामतीत मतदारांच्या विश्वासाची उघड उघड फसवणूक..!(प्रदिप गायकवाड मुख्य संपादक MK NEWS36)
बारामती| विशेष संपादकीय
“राजकारणात कोणी कायम शत्रू नसतो, कोणी कायम मित्र नसतो” हा जुना राजकीय वाक्प्रचार पुन्हा एकदा बारामतीच्या राजकारणात अंगावर येईल अशा पद्धतीने समोर आला आहे. मात्र यावेळी प्रश्न राजकीय युतीचा नसून, मतदारांच्या विश्वासाशी झालेल्या थेट विश्वासघाताचा आहे.
ज्या अपक्ष उमेदवारांनी “पक्ष चुकीचा आहे, पक्षात मनमानी चालते, पक्षाचे धोरण जनविरोधी आहे” अशी भूमिका घेत निवडणुकीच्या रणांगणात उडी घेतली, ज्यांनी पक्षावर, पक्ष नेतृत्वावर आणि तिकीट वाटपावर तोंडसुख घेत नागरिकांसमोर स्वतःला ‘न्यायाचा आवाज’ म्हणून मांडले — तेच अपक्ष आज त्याच पक्षाच्या दारात लाचारीने उभे असल्याचे चित्र बारामतीत दिसत आहे.
नागरिकांना विचार करून, भावनिक करून, पक्षाच्या विरोधात मतदान करण्याचे आवाहन करणाऱ्या या अपक्षांवर हजारो मतदारांनी विश्वास ठेवला. “पक्षाला धडा शिकवूया” या आवाहनाला प्रतिसाद देत नागरिकांनी पक्षाच्या विरोधात मतदान केले. तो मतदानाचा हक्क, तो विश्वास, ती भूमिका आज कुठे गेली?
आज हेच अपक्ष उमेदवार त्या पक्षाच्या कार्यक्रमांना हजेरी लावत आहेत, जाहीर पाठिंबा देत आहेत, रांगेत उभे राहून फोटो काढत आहेत. मग प्रश्न असा उभा राहतो —
👉 हा मतदार राजाचा अपमान नाही का?
👉 ज्यांनी विश्वासाने मत दिले, त्यांची फसवणूक नाही का?
तिकीट न मिळाल्यामुळे पक्षावर ताशेरे ओढणारे, पदाधिकाऱ्यांवर आरोप करणारे, “हा पक्ष जनतेचा नाही” म्हणणारे आज त्याच पक्षाच्या व्यासपीठावर बसलेले दिसतात. इतकी राजकीय कातडी बदलण्यामागे नेमका हेतू काय? स्वतःचा स्वार्थ? पद? सत्तेची जवळीक?
जर शेवटी पक्षाच्याच दारात येऊन उभे राहायचे होते, तर मग अपक्ष निवडणूक लढवून नेमके काय साध्य केले?
— मतदारांची दिशाभूल?
— नागरिकांची फसवणूक?
— की केवळ स्वतःची पोळी भाजून घेण्याचा राजकीय खेळ?
आज बारामतीतील चहाच्या टपऱ्यांपासून चौकापर्यंत एकच चर्चा रंगली आहे —
“ज्यांच्यासाठी आम्ही पक्षाविरोधात उभे राहिलो, त्यांनीच आम्हाला वाऱ्यावर सोडले!”
राजकारणात भूमिका बदलणे नवे नाही, पण मतदानाच्या आधी आणि नंतर भूमिका बदलणे म्हणजे मतदारांच्या बुद्धिमत्तेचा अपमान आहे. बारामतीचा मतदार आज हा सवाल विचारतो आहे —
आम्ही मतदान केले होते विकासासाठी की तुमच्या स्वार्थासाठी?
हा प्रश्न केवळ अपक्षांपुरता मर्यादित नाही, तर भविष्यात अशा राजकारणावर विश्वास ठेवावा की नाही, याचाही आहे.
कारण मतदार फसवला गेला, तर लोकशाही कमकुवत होते — आणि बारामतीचा नागरिक हे कधीच विसरणार नाही.

“वाचत रहा विचारत रहा सतत कारण आवाज उठवणे हा  नागरिकांचा हक्क व त्यांचे विचार मांडणे हे आमचं काम वाचत रहा.”.MK NEWS36