🔥 “सुपा गॅसचा बालेकिल्ला अजून अबाधित — झारगडवाडीप्रमाणे येथेही कारवाई होईल का?”

🔥MK NEWS 36 

सुपा परिसरात गॅस रिफिलिंगचा “बालेकिल्ला”; नागरिकांचा सवाल — अधिकारी डोळ्यावर पट्टी का बांधून बसले?
(प्रदीप गायकवाड – मुख्य संपादक, MK NEWS36 )

सुपा – झारगडवाडीतील बेकायदेशीर गॅस साठवणुकीवर झालेल्या कारवाईनंतर आता सुपा परिसरातील गॅस रिफिलिंग व रिफिलिंगचा बालेकिल्ला पुन्हा चर्चेत आला आहे. येथे बेकायदेशीरपणे सुरू असलेल्या गॅस रिफिलिंग व्यवसायाकडे पुरवठा विभाग, पोलिस यंत्रणा आणि स्थानिक प्रशासन डोळ्यावर पट्टी बांधून बसले आहेत का, हा नागरिकांना पडलेला गंभीर प्रश्न आहे.

झारगडवाडीमध्ये MK NEWS 36च्या बातम्या प्रसिद्ध झाल्यानंतर त्याचा इम्पॅक्ट म्हणून काही दिवसांपूर्वी पोलिसांनी आणि पुरवठा अधिकाऱ्यांनी संयुक्त कारवाई करत ४८ हजार रुपयांचा अवैध गॅस साठा जप्त केला होता. मात्र, सुपा हे या संपूर्ण भागातील सर्वात मोठे गॅस रिफिलिंगचे केंद्र असूनही येथे अद्यापही ठोस कारवाई झालेली नाही. स्थानिकांच्या मते, सुपा येथूनच बेकायदेशीर गॅस रिफिलिंगचा मोठा पुरवठा होत आहे, आणि हा व्यवसाय गॅस एजन्सींच्या सब-डिस्ट्रिब्युटरच्या नावाखाली चालवला जातो.

“हम पाच” चं संरक्षण?
नागरिकांचा आरोप आहे की या धंद्यांना स्थानिक “हम पाच” — म्हणजेच काही प्रभावशाली व्यक्ती आणि पोलिस यंत्रणेतील काही मंडळी — यांचे संरक्षण लाभले आहे. त्यामुळे कितीही तक्रारी झाल्या, तरी कारवाईचे ढोंग होते; पण मुख्य सूत्रधार मात्र मोकळेपणाने आपला बेकायदेशीर धंदा चालवत आहेत.

एपीआय लक्ष देतील का?
सोपाच्या पोलीस ठाण्याचे प्रमुख अधिकारी एपीआय यांचे या प्रकरणात लक्ष वेधले जात आहे. नागरिकांचा सवाल आहे की, लहानसहान केबल चोरीसारख्या प्रकरणांत पोलिस तत्परता दाखवतात, पण मोठ्या बेकायदेशीर रिफिलिंग धंद्यांकडे दुर्लक्ष का? हे केवळ पैशांच्या देवाणघेवाणीचे परिणाम आहेत का?

दारू, मटका, पत्त्यांचे अड्डे – सर्व काही सुरूच!
गॅस रिफिलिंग एवढंच नाही, तर दारू, मटका, पत्त्यांचे क्लब, आणि इतर बेकायदेशीर धंदे सुद्धा या परिसरात खुलेआम सुरू असल्याचे नागरिक सांगतात. या सगळ्यावर “हम पाच” च्या वसुलीचा ताबा असून, रुप_श साळु_खे, वाघ_मडे, लो_ढे, भाग्य_वत द_कर अशी काही नावे स्थानिकांमध्ये फिरत आहेत.

“इंदापूरनंतर सुपाही चर्चेत येणार?”
इंदापूरमध्ये अलीकडेच एका पोलीस अधिकाऱ्याच्या वादग्रस्त प्रकरणामुळे मोठी चर्चा रंगली होती. त्याच धर्तीवर सुपातील ही बेकायदेशीर साखळी आता उघड होण्याची चिन्हे आहेत. नागरिकांचे म्हणणे आहे की, “इथेही कदाचित लोकांना उपोषण करावे लागेल, तेव्हाच कारवाई होईल!”

नागरिकांचा आक्रोश – “कोणी तरी ऐकणार का?”
सोपा परिसरातील ही परिस्थिती पाहता नागरिकांनी थेट सवाल उपस्थित केला आहे —

> “एखादा अनर्थ, जीवितहानी झाल्याशिवाय अधिकाऱ्यांचे डोळे उघडणार आहेत का?”

सुपा परिसरात सुरू असलेला हा बेकायदेशीर गॅस रिफिलिंगचा महागठ्ठा, स्थानिक प्रशासन, पोलिस आणि पुरवठा विभाग यांच्यासाठी लाजिरवाणा आणि धोकादायक प्रश्न बनला आहे. आता बघायचं इतकंच की, झारगडवाडीप्रमाणे येथेही कारवाईची ‘स्फोटक’ नोंद होते का की, पुन्हा एकदा पैशांची पट्टी डोळ्यावर घट्ट बांधून यंत्रणा “नि:शब्द” राहते?