“मामा, जनतेला मामा बनवू नका!” इंदापूरच्या सरकारी रुग्णालयाच्या कारभारावर नागरिकांचा सवाल..!

🔥MK NEWS36 

इंदापूर उपजिल्हा रुग्णालय नावालाच? नागरिकांचा संताप; आरोग्य व्यवस्थेवर गंभीर प्रश्न

“मामा, जनतेला मामा बनवू नका; आधी रुग्णालयाकडे लक्ष द्या!” नागरिकांचा संतप्त सवाल

इंदापूर | प्रतिनिधी : सागर समिंदर

पुणे–सोलापूर राष्ट्रीय महामार्गावरील महत्त्वाचे तालुक्याचे ठिकाण असलेल्या इंदापूर शहरातील शासकीय आरोग्य व्यवस्थेबाबत नागरिकांमध्ये तीव्र नाराजी व्यक्त होत आहे. उपजिल्हा रुग्णालयाचा दर्जा असतानाही अपेक्षित आरोग्य सुविधा मिळत नसल्याचा आरोप नागरिकांकडून होत असून, “उपजिल्हा रुग्णालय असूनही परिस्थिती ग्रामीण रुग्णालयापेक्षाही बिकट आहे का?”, असा सवाल उपस्थित केला जात आहे.

इंदापूर मतदारसंघाला यापूर्वी माजी सहकारमंत्री हर्षवर्धन पाटील यांचे नेतृत्व लाभले, तर सध्या आमदार दत्तात्रय भरणे हे राज्याच्या मंत्रिमंडळात जबाबदारी सांभाळत आहेत. मात्र, मतदारसंघातील सर्वसामान्य नागरिकांना दर्जेदार शासकीय आरोग्य सुविधा उपलब्ध करून देण्यासाठी ठोस उपाययोजना का होत नाहीत, असा प्रश्न नागरिक उपस्थित करीत आहेत.

💢गंभीर रुग्णांना बारामती, सोलापूर, पुण्याची वाट

उपजिल्हा रुग्णालयात उपचारासाठी येणाऱ्या गरीब व सर्वसामान्य रुग्णांना अपेक्षित उपचार वेळेत मिळत नसल्याच्या तक्रारी पुढे येत आहेत. गंभीर किंवा गुंतागुंतीच्या प्रकरणांमध्ये रुग्णांना बारामती, सोलापूर अथवा पुणे येथील मोठ्या रुग्णालयांकडे पाठवावे लागत असल्याचा दावा नागरिकांकडून करण्यात येत आहे.

खासगी रुग्णालयातील उपचारांचा खर्च अनेक गरीब कुटुंबांना परवडत नसल्याने शासकीय रुग्णालयातच योग्य, तत्काळ आणि सक्षम उपचार मिळणे अपेक्षित आहे. त्यामुळे या तक्रारींची प्रशासनाने गांभीर्याने दखल घेण्याची मागणी होत आहे.

🙏डॉक्टरांच्या खासगी प्रॅक्टिसच्या आरोपांची चौकशीची मागणी?

काही शासकीय डॉक्टर शासकीय सेवेत असतानाच परिसरात खासगी प्रॅक्टिस करीत असल्याचे आरोप नागरिकांकडून करण्यात येत आहेत. हे आरोप सत्य आहेत की नाहीत, याची स्वतंत्र व निष्पक्ष चौकशी करण्याची मागणी होत आहे.

संबंधित डॉक्टरांची रुग्णालयातील उपस्थिती, बायोमेट्रिक हजेरी, ड्युटी चार्ट, रुग्ण तपासणी नोंदी आणि शासकीय सेवेत असताना खासगी प्रॅक्टिसबाबतचे नियम यांची तपासणी केल्यास वस्तुस्थिती स्पष्ट होऊ शकते, असे नागरिकांचे म्हणणे आहे.

🎈गर्भवती महिलेच्या उपचाराबाबतही प्रश्नचिन्ह

दरम्यान, एका गर्भवती महिलेची प्रकृती बिघडल्यानंतर तिला अपेक्षित उपचार मिळाले नसल्याचा आरोप करण्यात आला आहे. संबंधित महिलेला गर्भपात झाल्यानंतर ताप आणि रक्ताची कमतरता असल्याचे सांगण्यात आले. मात्र, योग्य उपचार न मिळाल्याने अखेर तिला बारामती येथे उपचारासाठी जावे लागल्याचा दावा करण्यात येत आहे.

या प्रकरणातील वैद्यकीय नोंदी, उपचारपत्रिका, औषधोपचार, रेफरल नोंद आणि संबंधित डॉक्टरांची ड्युटी यांची चौकशी झाल्यास नेमकी वस्तुस्थिती समोर येऊ शकते. त्यामुळे या आरोपांची अधिकृत वैद्यकीय चौकशी होणे आवश्यक आहे.

🗞️“शिकाऊ डॉक्टरांच्या भरवशावर रुग्णालय?”

रुग्णालयात येणाऱ्या रुग्णांवर अनुभवी वरिष्ठ वैद्यकीय अधिकाऱ्यांच्या देखरेखीखाली उपचार होणे अपेक्षित असताना, काही वेळा कनिष्ठ अथवा प्रशिक्षणार्थी डॉक्टरांवर उपचाराची जबाबदारी असल्याची तक्रार नागरिकांकडून केली जात आहे.

याबाबत रुग्णालयातील वरिष्ठ डॉक्टरांची उपस्थिती, ड्युटी रोस्टर, ऑन-कॉल व्यवस्था तसेच प्रशिक्षणार्थी डॉक्टरांच्या कामकाजावर वरिष्ठांची देखरेख आहे का, याची तपासणी करण्याची मागणी होत आहे.

💥मंत्र्यांनी आरोग्य व्यवस्थेकडे लक्ष देण्याची मागणी

“राज्यात मंत्रीपदाची जबाबदारी सांभाळताना मतदारसंघातील सर्वसामान्य जनतेच्या आरोग्य सुविधांकडेही गांभीर्याने पाहणे गरजेचे आहे. निवडणुकीच्या काळात मतदार महत्त्वाचा आणि त्यानंतर उपचारासाठी त्याच जनतेला बाहेर जावे लागत असेल, तर याचा विचार करण्याची वेळ आली आहे,” अशी संतप्त प्रतिक्रिया काही नागरिकांनी व्यक्त केली.

“मामा, जनतेला मामा बनवू नका; आधी इंदापूरच्या रुग्णालयाकडे झाकून पाहा!” अशी उपरोधिक प्रतिक्रिया नागरिकांमधून उमटत आहे.

👍उच्चस्तरीय चौकशीची मागणी

इंदापूर उपजिल्हा रुग्णालयातील डॉक्टरांची उपस्थिती, खासगी प्रॅक्टिसचे आरोप, औषधसाठा, वैद्यकीय उपकरणांची उपलब्धता व वापर, रुग्णांना दिले जाणारे उपचार, रेफरलची कारणे, मनुष्यबळ, स्वच्छता आणि प्रशासनाची कार्यपद्धती यांची उच्चस्तरीय चौकशी करण्याची मागणी नागरिकांकडून होत आहे.

केवळ माध्यमांमध्ये बातम्या प्रसिद्ध होऊन प्रश्न सुटणार नाहीत. प्रत्यक्ष चौकशी करून त्रुटी आढळल्यास जबाबदारी निश्चित करणे आणि दोषींवर नियमानुसार कारवाई करणे गरजेचे असल्याची मागणी नागरिकांनी केली आहे.

📍“दुरून डोंगर साजरे; प्रत्यक्षात रुग्णालय सलाईनवर!”

इंदापूरला राजकीयदृष्ट्या मोठे महत्त्व असताना सर्वसामान्य नागरिकांना उपचारासाठी बारामती, पुणे किंवा सोलापूरकडे धाव घ्यावी लागत असेल, तर उपजिल्हा रुग्णालयाचा उद्देश नेमका काय?, असा सवाल आता नागरिकांकडून उपस्थित केला जात आहे.

या संपूर्ण प्रकरणावर आमदार तथा मंत्री दत्तात्रय भरणे यांची भूमिका काय? आरोग्य विभाग या तक्रारींची चौकशी करणार का? आणि इंदापूर उपजिल्हा रुग्णालयाला खऱ्या अर्थाने आवश्यक मनुष्यबळ, उपकरणे व वैद्यकीय सुविधा कधी मिळणार? याकडे इंदापूरकरांचे लक्ष लागले आहे.

दरम्यान, या वृत्तातील आरोपांबाबत संबंधित डॉक्टर, रुग्णालय प्रशासन तसेच आमदार तथा मंत्री दत्तात्रय भरणे यांची अधिकृत बाजू उपलब्ध झाल्यास ती प्रसिद्ध करण्यात येईल.