स्पीडब्रेकर की मृत्यूचे आमंत्रण? बारामती हादरली अपघातांच्या मालिकेने

🔥 MK NEWS 36 संपादकीय 

शनिवार ठरला अपघातांचा काळा दिवस – बारामती हादरली..!

बारामती तालुका व परिसर शनिवारी अक्षरशः अपघातांच्या मालिकेने हादरला. सकाळी शारदा नगर परिसरात फलटणचे पत्रकार राजेंद्र भागवत यांचा भीषण अपघातात मृत्यू झाला.

तर रात्री उशिरा बारामतीत आणखी एक धक्कादायक घटना घडली. अहिल्यादेवी होळकर महाविद्यालयाची विद्यार्थीनी शरयू संजय मोरे (रा. सांगली) व तिची मैत्रीण दोघी गाडीवरुन जात असताना ऊर्जा भवनजवळील स्पीडब्रेकरचा अंदाज न आल्याने दुचाकीचा तोल सुटला. गाडी रस्त्यालगत जोरात धडकली आणि शरयू हिच्या डोक्याला गंभीर मार लागून तिचा जागेवरच मृत्यू झाला. तिची मैत्रीण किरकोळ जखमी झाली आहे.

अपघात थांबवायचे कधी?

दर आठवड्याला, दर दिवशी नवनवीन अपघातांच्या बातम्या बारामतीकरांना हादरवून सोडत आहेत. नागरिकांचा प्रश्न स्पष्ट आहे – “स्पीडब्रेकर बसवले म्हणून अपघात थांबले का?”
खरं तर बारामतीत गरजेपेक्षा जास्त स्पीडब्रेकर आहेत, तरीही अपघाताची मालिका कमी होण्याऐवजी वाढतच आहे. चुकीच्या ठिकाणी, नियमबाह्य पद्धतीने बसवलेले स्पीडब्रेकर आणि वाहतुकीवर नियंत्रण ठेवणाऱ्या यंत्रणांची बेपर्वाई ही मोठी कारणे असल्याचा नागरिकांचा आरोप आहे.

बारामतीची ओळख धोक्यात?

सांगली जिल्ह्यातील शरयू मोरे हिच्यासारखे अनेक विद्यार्थी बारामतीत उच्च शिक्षणासाठी दाखल होतात. पुण्यानंतर शिक्षणाचे माहेरघर अशी ओळख बारामतीने मिळवली होती. मात्र, वारंवार होणाऱ्या अपघातांच्या मालिकेमुळे या प्रतिमेवर प्रश्नचिन्ह निर्माण झाले आहे.

नागरिकांचा संताप

नागरिकांचा रोष स्पष्ट आहे –

चुकीच्या ठिकाणी असलेले स्पीडब्रेकर,

रस्त्यांची अकार्यक्षमता,

पोलिसांचा निष्क्रियपणा,

या सगळ्यामुळे तरुणांचे जीव जात आहेत. “किती बळी गेल्यावर प्रशासन जागे होणार?” असा थेट प्रश्न नागरिक विचारत आहेत.

पर्यायी उपाययोजना गरजेच्या

नागरिकांची मागणी आहे की –

1. स्पीडब्रेकरची पुनर्मोजणी व वैज्ञानिक रचना केली जावी.

2. अपघातग्रस्त भागांवर विशेष लक्ष केंद्रित करावे.

3. वाहतूक नियमांची कडक अंमलबजावणी करावी.

4. स्पीडब्रेकरऐवजी आधुनिक ट्रॅफिक व्यवस्थेचे पर्याय (उदा. सीसीटीव्ही, स्मार्ट सिग्नल, स्पीड गन, रंबल स्ट्रिप्स) राबवावेत.

 

बारामतीतील अपघातांची ही साखळी जर अशीच सुरु राहिली, तर शिक्षणाचे केंद्र म्हणून मिळवलेली बारामतीची प्रतिष्ठा धोक्यात येईल, अशी भीती व्यक्त केली जात आहे.