“आरोपी १२ तासांत जेरबंद; ७० वर्षीय महिलेचे शीर अद्याप बेपत्ता, दौंड पोलिसांच्या तपासावर प्रश्नचिन्ह”

🔥MK NEWS36 

आरोपी सापडले, मग मृत महिलेचे शीर का नाही? दौंड पोलिसांच्या तपासावर प्रश्नचिन्ह

दौंड | प्रतिनिधी – प्रकाश सोनवणे

दौंड पोलीस ठाण्याच्या हद्दीतील आर. बी. १ नगरमोरी परिसरात ७० वर्षीय सुमन किसन शिंदे यांची निर्घृण हत्या झाल्याची धक्कादायक घटना १९ ऑगस्ट रोजी घडली. धारदार हत्याराने शिरच्छेद करून हत्या करण्यात आल्याची प्राथमिक माहिती समोर आली असून, या प्रकरणातील दोन संशयित आरोपींना दौंड पोलिसांनी अवघ्या १२ तासांत ताब्यात घेतले आहे. मात्र, हत्येनंतर बेपत्ता करण्यात आलेले मृत महिलेचे शीर अद्याप पोलिसांच्या हाती लागलेले नसल्याने तपास यंत्रणेच्या कार्यक्षमतेवर प्रश्न उपस्थित होत आहेत.

पोलिसांच्या माहितीनुसार, विकी उर्फ विक्रम धनराज अल्हाट आणि प्रसाद बाबूलाल चव्हाण यांना ताब्यात घेऊन चौकशी केली असता त्यांनी गुन्ह्याची कबुली दिल्याचे पोलिसांनी सांगितले आहे. याप्रकरणी दौंड पोलीस ठाण्यात गुन्हा रजि. नं. ६१२/२०२६ अन्वये BNS कलम १०३(१), २३८ अंतर्गत गुन्हा दाखल करण्यात आला आहे.

आरोपी १२ तासांत सापडले; शीर शोधण्यात मात्र अपयश?

घटनेनंतर पोलिसांनी तपासाची चक्रे वेगाने फिरवत संशयितांचा शोध घेतला आणि दोन्ही आरोपींना अल्पावधीत ताब्यात घेतले. आरोपींचा शोध घेण्यात पोलिसांना मिळालेले यश महत्त्वाचे असले, तरी गुन्ह्याचा महत्त्वाचा पुरावा असलेले मृत महिलेचे शीर अद्याप बेपत्ता असल्याने अनेक प्रश्न निर्माण झाले आहेत.

पोलिसांच्या माहितीनुसार, पुरावा नष्ट करण्याच्या उद्देशाने शीर दुसऱ्या ठिकाणी नेण्यात आल्याचे तपासात समोर आले आहे. असे असल्यास आरोपींकडून मिळालेली माहिती, घटनास्थळाची पाहणी, संभाव्य ठिकाणांची झडती, सीसीटीव्ही फुटेज तसेच तांत्रिक तपासाच्या आधारे शीर शोधण्यासाठी पोलिसांकडून कोणती पावले उचलण्यात आली, याकडे नागरिकांचे लक्ष लागले आहे.

तपासात नेमकी उणीव कुठे?

आरोपींना अटक करण्यात पोलिसांनी तत्परता दाखवली असली, तरी मृतदेहाचा महत्त्वाचा भाग अद्याप सापडलेला नसणे ही तपासाच्या दृष्टीने गंभीर बाब आहे. मृत महिलेचे शीर सापडल्यानंतर या हत्येतील अनेक महत्त्वाचे पुरावे आणि घटनाक्रम स्पष्ट होण्यास मदत होऊ शकते.

त्यामुळे आरोपींकडून मिळालेल्या माहितीच्या आधारे पोलिसांनी व्यापक शोधमोहीम राबवून शीर तातडीने शोधून काढावे, अशी मागणी नागरिकांकडून होत आहे. तसेच तपासात कोणतीही हलगर्जी किंवा निष्काळजीपणा झाला आहे का, याची वरिष्ठ पोलीस अधिकाऱ्यांनीही पडताळणी करावी, अशी अपेक्षा व्यक्त केली जात आहे.

दौंडकरांमध्ये अस्वस्थता..

७० वर्षीय महिलेची अशा क्रूर पद्धतीने हत्या झाल्याने परिसरात खळबळ उडाली आहे. त्यातच आरोपींना अवघ्या १२ तासांत अटक झाली असताना मृत महिलेचे शीर अद्याप सापडले नसल्याने नागरिकांमध्ये अस्वस्थता निर्माण झाली आहे.

आरोपींना अटक करणे ही तपासातील महत्त्वाची बाब असली, तरी गुन्ह्याचा संपूर्ण तपास करून सर्व महत्त्वाचे पुरावे हस्तगत करणे तितकेच आवश्यक आहे.

या प्रकरणाचा पुढील तपास पोलीस उपनिरीक्षक लोकरे करीत आहेत. आता पोलिसांकडून मृत महिलेचे शीर कधी शोधले जाते आणि या हत्येमागील संपूर्ण घटनाक्रम तपासातून कधी समोर येतो, याकडे दौंडकरांचे लक्ष लागले आहे.

प्रश्न मात्र कायम आहे—आरोपी १२ तासांत सापडले, मग मृत महिलेचे शीर अद्याप का सापडले नाही?