💧 नगरपालिकेच्या निष्काळजीपणामुळे शाळेत दुर्गंधी व डासांचा त्रास — पालक संतप्त..!

MK NEWS 36 423 Views October 17, 2025

🔥MK NEWS 36

📰 दौंड शहरातील सेंट सॅबिस्टीयन हायस्कूल परिसरात सांडपाण्याचा दूर्गंधीचा त्रास — विद्यार्थी व पालक त्रस्त, तातडीने उपाययोजनांची मागणी

दौंड (प्रतिनिधी) —
दौंड शहरातील सेंट सॅबिस्टीयन हायस्कूल व नवीन तहसील कार्यालयाच्या मधील रस्त्यावरील सांडपाण्याचा प्रश्न गंभीर झाला असून, शाळेच्या मुख्य गेटमधून थेट घाण सांडपाणी शाळेच्या आवारात वाहत येत आहे. यामुळे विद्यार्थी, विद्यार्थीनी, पालक तसेच शिक्षकवर्ग यांचे आरोग्य धोक्यात आले आहे.

शाळेच्या आवारात सांडपाणी साचल्याने दुर्गंधी पसरली आहे, डासांचा प्रादुर्भाव वाढत असून मुलांना वर्गात बसणेही कठीण झाले आहे. काही पालकांनी तर आपल्या मुलांना आजार होऊ नयेत म्हणून शाळेत पाठवणे टाळले, अशी माहिती समोर आली आहे. परिसरात डेंग्यू, मलेरिया यांसारख्या आजारांचा धोका निर्माण झाला आहे.

स्थानिक नागरिक व पालकांनी दौंड नगरपालिका, तालुका आरोग्य विभाग तसेच उपजिल्हा रुग्णालयाकडे तातडीने उपाययोजनांची मागणी केली आहे. तरीही अनेक वेळा तक्रारी दिल्यानंतरही अद्याप ठोस उपाय झालेले नाहीत, असा आरोप आम आदमी पार्टी दौंड शाखेने केला आहे.

पक्षाच्या प्रतिनिधींनी सांगितले की, “शाळेच्या गेटसमोरच सांडपाणी वाहत आहे. मुलांच्या आरोग्याशी खेळ चालला आहे. नगरपालिका आणि आरोग्य विभागाने तत्काळ स्वच्छता मोहीम राबवून हा प्रश्न कायमस्वरूपी सोडवावा, अन्यथा आंदोलनाचा इशारा दिला जाईल.”

दरम्यान, पालकांनी प्रशासनाला आवाहन केले आहे की, शाळेच्या परिसरातील ड्रेनेज लाईन तातडीने दुरुस्त करावी, तसेच रस्त्यावरील सांडपाणी वाहून नेण्यासाठी कायमस्वरूपी नालीव्यवस्था उभारावी.
स्थानिक रहिवाशांच्या मते, हा प्रश्न गेल्या काही महिन्यांपासून सुरू असून पावसाळ्यात परिस्थिती अधिक बिकट होते.

दौंड शहरातील या सांडपाण्याच्या समस्येकडे आता नगरपालिकेने व आरोग्य विभागाने गांभीर्याने लक्ष द्यावे, अशी अपेक्षा नागरिकांकडून व्यक्त होत आहे.