उपकेंद्रांतील गैरहजेरीपासून प्रॉपर्टीपर्यंत; भ्रष्टाचाराचा ‘गुरु’ कोण?

🔥MK NEWS36 

“जिल्हा हिवताप कार्यालयातील भ्रष्टाचाराचा महाघोटाळा; चार जिल्ह्यांत जाळे, माहिती देण्यास टाळाटाळ!”

प्रदीप गायकवाड (मुख्य संपादक MK NEWS36)

जिल्हा हिवताप कार्यालय म्हटलं की सर्वसामान्य नागरिकांच्या मनात आरोग्य सेवा, उपकेंद्रे, गरीबांसाठी उपचार व्यवस्था आणि जनतेच्या करातून चालणारा प्रामाणिक सरकारी कारभार अशी प्रतिमा उभी राहते. मात्र प्रत्यक्षात चित्र पूर्णपणे उलट असल्याचे धक्कादायक वास्तव समोर येत आहे.

अहिल्यानगर, पुणे, सातारा आणि सोलापूर या चार जिल्ह्यांमध्ये आरोग्य विभागातील काही अधिकारी आणि कर्मचारी यांनी भ्रष्टाचाराचे मोठे जाळे उभे केल्याची गंभीर बाब उघड होत आहे. उपकेंद्रांवर गैरहजर राहणारे कर्मचारी, कागदोपत्री कामे पूर्ण दाखवणे, निधीचा अपव्यय आणि संगनमताने चालणारे व्यवहार यामुळे हा प्रकार केवळ एका कार्यालयापुरता मर्यादित नसून बहुजिल्हास्तरीय घोटाळ्याचे रूप धारण करत आहे.

या संपूर्ण प्रकरणात सर्वात मोठा प्रश्न उपस्थित होतो तो म्हणजे – या भ्रष्टाचाराचा ‘गुरु’ कोण?

कोणाच्या मार्गदर्शनाखाली हे जाळे विणले गेले? आणि कोणाच्या संरक्षणामुळे हे प्रकार वर्षानुवर्षे सुरू आहेत?

पुणे, अहिल्यानगर आणि सातारा येथील कार्यालयांमधील काही क्लार्क व अधिकारी यांच्या संगनमताशिवाय एवढा मोठा प्रकार शक्यच नाही, अशी शंका अधिक बळावत आहे. सरकारी यंत्रणेत असलेल्या काही मोजक्या व्यक्तींनीच या भ्रष्टाचाराला खतपाणी घालून स्वतःची संपत्ती, प्रॉपर्टी आणि आर्थिक साम्राज्य उभे केले असल्याचे प्राथमिक तपासातून समोर येत आहे.

विशेष म्हणजे, या प्रकरणाची माहिती मिळवण्यासाठी माहितीच्या अधिकाराखाली अर्ज करूनही संबंधित अधिकाऱ्यांकडून जाणीवपूर्वक माहिती देण्यास टाळाटाळ केली जात आहे. कायद्याच्या पळवाटा शोधून माहिती रोखण्याचा प्रयत्न होत असल्याचे स्पष्ट दिसून येत आहे. ही बाब केवळ संशयास्पद नाही तर थेट कायद्याचा अवमान करणारी आहे.

माहितीचा अधिकार हा नागरिकांचा मूलभूत हक्क असून, संबंधित अधिकाऱ्यांना माहिती देणे बंधनकारक आहे. तरीही माहिती लपवण्याचा प्रयत्न म्हणजे काहीतरी मोठे दडवण्याचा प्रकार असल्याची शक्यता नाकारता येत नाही.

या सर्व पार्श्वभूमीवर आता एकच गोष्ट स्पष्ट होते –

“सत्य त्रास देऊ शकते, पण पराभूत होऊ शकत नाही.”

या प्रकरणाची सखोल चौकशी सुरू असून, येत्या काळात संबंधित अधिकारी व क्लार्क यांची नावे जाहीर केली जाणार आहेत. जनतेच्या पैशावर चालणाऱ्या यंत्रणेत भ्रष्टाचार करणाऱ्यांना उघडे पाडणे हीच पत्रकारितेची खरी जबाबदारी आहे.

हा लढा थांबणार नाही…

कारण हा प्रश्न केवळ भ्रष्टाचाराचा नाही, तर जनतेच्या हक्कांचा आहे.